Læknisvottorð fyrir byssu

Sem betur fer er líklega erfitt fyrir flesta Íslendinga að skilja innilegt samband bandaríkjamanna við byssur sínar.  Hér er hins vegar dæmi sem skýrir málið nokkuð vel.

Farið er sem sagt að framleiða byssur sem auðveldara er að nota en þær hefðbundnu, með því markmiði að gera gigtveikum og öðrum veikburða sjúklingum mögulegt að hleypa af sem ekki ráða við stífan byssugikk.

Menn upplifa þörfina fyrir að hafa byssu til að verja sig hér svo sterka að reynt var að fá FDA (matvæla-og lyfjaeftirlitið hér úti) til að skilgreina þessa byssu sem læknisfræðilegt hjálpartæki.  Markmiðið var sem sagt að fá lækna til að skrifa upp á þörf einstaklinga fyrir þetta vopn og láta þannig sjúkratryggingakerfið borga fyrir.

Sem betur fer er FDA ein af opinberum stofnunum sem enn hefur einhvern vott af skynsemi eftir 8 ára stjórnartíma Bush, þó sumar ákvarðanir stofnunarinnar hafa nokkuð augljóslega verið teknar með hagsmuni iðnaðar en ekki almennings í huga.  Því hefur FDA eiginlega bara hlegið að þessari hugmynd.

En, þessi skilgreinda þörf fyrir að eiga vopn til að verja sig er ótrúlega sterk hér úti.  Það sem fæstir skilja hins vegar eru raunverulegu tölurnar um hvaða áhrif þetta hefur, því í raun er mun líklegra að voðaskot verði á heimilinu eða að vopnið verði notað í heimilisofbeldi en að það nýtist til að reka út innbrotsþjófa.

Annað sem kom mér nokkuð á óvart þegar einn byssuöfgatrúarmaðurinn sem starfar á deildinni minn hélt fyirlestur um hin ýmsu vopn og skotsár, var að menn skilgreina líkur á því að þú getir raunverulega drepið þann sem þú ert að skjóta.  Í einfeldni minni hélt ég alltaf að ef þú ætlaðir að beita skotvopni í nauðvörn myndu menn frekar miða á fótleggi, en í huga þessara manna er alltaf miðað við hvort maðurinn sé örugglega alveg stopp, þ.e. hafi hlotið banvænan áverka og hreyfi sig ekki meir.

Megi íslenskt þjóðfélag aldrei verða svona.

 

Athugasemdir

[steini (IP-tala skráð) 10.12.2008 kl. 17:38]

Já það er margt merkilegt hér í BNA en byssueign er ekki það merkilegasta að mínu mati, kannski vegna þess að ég hef sjálfur gaman af byssum.  En þar sem ég bý í suðurríkjunum, þar sem einna auðveldast er að kaupa byssur fór ég mér til gamans um síðustu helgi með syni mínum á byssu sýningu í Birmingham Alabama. Ég ætla ekki að nefna úrvalið en hér var hægt að kaupa allt sem þig langaði í. Nýjar AK47 niður í UZZI með hljóðdeyfi sem og ótrúlegt úrval af handbyssum.  En þarna hitti ég mann sem ég kannaðist við og fór að ræða við hann.  Hann sagðist hafa þrjú skotvopn heima hjá sér, til að verja sig ef brotist yrði inn hjá honum.  Hann sagðist mæla með haggla byssunni eða Colt python 357 magnum ef einhver kæmi óboðinn inn til þín.

Hann kom inná að það eru fleiri tilfelli þar sem eigandi byssunnar er drepinn með eigin byssu af innbrotsþjófi þar sem menn þora ekki í að taka í gikkinn þegar á reynir. En að lokum sagði hann við mig, passaðu bara að skjóta til að drepa, ef viðkomandi er kominn inn til þín þá er það minna mál að drepa viðkomandi heldur en að særa hann.  Lögreglan kemur bara og hirðir líkið og eftirmálarnir eru engir, svo framarlega sem þú drepur innbrotsþjófinn.  Það fara víst einhverjar sögur um menn sem eru skotnir í dyragættinni og dregnir inn fyrir en það má víst ekki.

[Kristján Valur Jónsson (IP-tala skráð) 11.12.2008 kl. 09:05]

Tja, það eru náttúrlega til hnífar fyrir gigtveika en þeir hafa náttúrlega ekki sama "stopping power" og almennieg sjúkrabyssa.