Hin heilaga fylgja

Nýlega var ég að undirbúa konu fyrir keisaraskurð, konu sem hafði flutt hingað frá Nígeríu fyrir fáeinum árum.  Ekkert óvenjulegt var við aðgerðina sjálfa, en hins vegar var aðeins óvenjulegt að þau hjónin óskuðu sérstaklega eftir að fá fylgjuna eftir aðgerðina.  Í spurt var hvers vegna kom í ljós að þau þurftu bara aðeins að fá fylgjuna til að eiginmaðurinn gæti farið með nokkrar bænir yfir henni, eins og mun vera til siðs í Nígeríu.

Í okkar vestrænu menningu fær fylgjan yfirleitt ekki nokkra athygli.  Hún er skoðuð til þess að ganga úr skugga um að engir hlutar hennar hafi orðið eftir í leginu, þar sem það getur leitt til lífshættulegra blæðinga og sýkinga, en eftir það er henni venjulega hent eins og hverju öðru rusli.  En, þetta stórmerkilega líffæri hefur nært heilt barn í 9 mánuði og hreinsað út úrgangsefni, án fylgju væri ekkert barn að fæðast.   Því finnst mér þetta eiginlega nokkuð fallegur siður að umgangast fylgjuna af virðingu.

Enginn hafði amk neitt á móti því að verða við óskum þessara heiðurshjóna.

Athugasemdir

[Svava Kristinsdottir (IP-tala skráð) 23.8.2007 kl. 01:05]

Sæll Hjalti

Ég kíki annað slagið á pislana hjá þér og hef gaman af því að lesa um upplifum þína af USA. Það er gaman að þú skildir minnast á þetta með fylgjuna því þetta kom einmitt upp hjá okkur þegar Árni Kristinn fæddist hérna úti og okkur boðið að taka fylgjuna heim. Við urðum nokkuð undrandi og slolítið sauðaleg á svipinn, en hér á NZ er það hefð hjá Maori að jarða fylgjuna og planta tréi yfir hana. Þannig er talið að hringnum sé lokað.  Þetta er bara smá fróðleiksmoli frá okkur andfætlingunum. Vona að allt gangi vel hjá ykkur fjölskyldunni.

kv Svava á Nýja Sjálandi 

[Hjalti Már Björnsson, 25.8.2007 kl. 03:13]

Takk fyrir þetta innlegg Svava, þetta er sem sagt stundað í fleiri ríkjum en Nígeríu að umgangast fylgjuna af virðingu.  Ef borið er saman við allar þær athafnir og umstang sem fylgja því að kveðja líkamann eftir dauðann í okkar vestrænu samfélögum er hálf furðulegt af hverju fylgjunni er hent í brennslu með öðru rusli.

Að planta tré ofan á fylgjunni er amk einfalt í framkvæmd og virðuleg, auk þess að vera umhverfisvæn, leið til þess að ráðstafa þessu sérkennilega líffæri sem á sinn hátt er undirstaða alls lífs okkar spendýranna.